俚拿匆出哉呀；难末拿仔件皮袄去当四块半洋钱。想想阿要气煞人！”

    双珠道：“会钱末也是俚赚得来洋钱去合个会，耐倒勿许俚用。”阿德保笑道：“三先生也蛮明白哚。俚真真用脱仔倒罢哉，耐看俚阿有啥用场嗄？沓来哚黄浦里末也听见仔点响声，俚是一点点响声也无拨唍。”双珠微笑不语。阿德保冲了茶，又随手绞了把手巾，然后下去。

    善卿挨近双珠，悄问道：“阿金有几花姘头嗄？”双珠忙摇手道：“耐要勿去多说多话。耐末算说白相，拨来阿德保听见仔要吵煞哉！”善卿道：“耐还搭俚瞒啥？我也晓得点来里。”

    双珠大声道：“瞎说哉喤！坐下来，我搭同说句闲话。”善卿仍退下归坐。双珠道：“倪无娒阿曾搭耐说起歇啥？”善卿低头一想，道：“阿是要买个讨人？”双珠点头道：“说好哉呀，五百块洋钱哚。”善卿道：“人阿缥致嗄？”双珠道：“就要来快哉。我是勿曾看见，想来比双宝缥致点哚。”善卿道：“房间铺来哚陆里呢？”双珠道：“就是对过房间。双宝末搬仔下头去。”善卿叹道：“双宝心里是也巴勿得要好，就吃亏仔老实点，做匆来生意。”双珠道：“倪无娒为仔双宝，也豁脱仔几花洋钱哉。”善卿道：“耐原照应点俚，劝劝耐无娒看过点，赛过做好事。”正说时，只听得一路大脚声音，直跑到客堂里，连说：“来哉，来哉！”善卿忙又向楼窗口去看，乃是大姐巧囤跑得喘吁吁的。

    善卿知道那新买的讨人来了，和双珠爬在窗槛上等候。只见双珠的亲生娘周兰亲自搀著一个清倌人进门，巧囡前走，径上楼来。周兰直拉到善卿面前，问道：“洪老爷，耐看看倪小先生阿好？”善卿故意上前去打个照面。巧囡教他叫洪老爷，他便含含糊糊叫了一声，却羞得别转脸去，彻耳通红。善卿见那一种风韵可怜可爱，正色说道：“出色哉！恭喜，恭喜！发财，发财！”周兰笑道：“谢谢耐金口。只要俚巴结点，也像仔俚哚姊妹三家头末，好哉。”口里说，手指著双珠。善卿回头向双珠一笑。双珠道：“阿姐是才嫁仔人了，好哉。单剩我一干仔，无啥人来讨得去，要耐养到老死哚，啥好嗄！”周兰呵呵笑道：“耐有洪老爷来里唍。耐嫁仔洪老爷，比双福要加倍好哚。洪老爷阿是？”

    善卿只是笑。周兰又道：“洪老爷先搭倪起个名字，等俚会做仔生意末，双珠就拨仔耐罢。”善卿道：“名字叫周双玉，阿好？”双珠道：“阿有啥好听点个嗄？原是‘双’啥‘双’啥，阿要讨人厌！”周兰道：“周双玉无啥；把势里要名气响末好。叫仔周双玉，上海滩浪随便啥人，看见牌子就晓得是周双珠哚个妹子哉唍，终比仔新鲜名字好点哚。”巧囡在傍笑道：“倒有点像大先生个名字。周双福，周双玉，阿是听仔差勿多？”双珠笑道：“耐末晓得哈差勿多。阳台浪晾来哚一块手帕子搭我拿得来。”

    巧囡去后，周兰挚过双玉，和他到对过房里去。善卿见天色晚将下去，也要走了。双珠道：“耐啥要紧喤？”善卿道：“我要寻个朋友去。”双珠起身，待送不送的，只嘱咐道：“耐晚歇要转去末，先来一埭，要勿忘记。”

    善卿答应出房。那时娘姨阿金已不在客堂里，想是别处去了。善卿至楼门口，隐隐听见亭子间有饮泣之声。从帘子缝里一张，也不是阿金，竟是周兰的讨人周双宝，淌眼抹泪，面壁而坐。善卿要安慰他，跨进亭子，搭讪问道：“一干子来里做啥？”那周双宝见是善卿，忙起身陪笑，叫一声“洪老爷”，低头不语。善卿又问道：“阿是耐要搬到下头去哉？”双室只点点头。善卿道：“下头房间倒比仔楼浪要便当多花哚。”双宝手弄衣襟，仍是不语。善卿不好深谈，但道：“耐闲仔点，原到楼浪来阿姐搭多坐歇，说说闲话也无啥。”双宝方微微答应。善卿乃退出下楼，双宝倒送至楼梯边而回。

    善卿出了