道：“少微高仔点，也无啥。俚是梳惯仔，改勿转哉，阿晓得？”雪香道：“我看耐个头阿好。”蕙贞道：“先起头倪老外婆搭我梳个头，倒无啥；故歇教娘姨梳哉，耐看阿好？”说着，转过头来给雪香看。雪香道：“忒歪哉。说末说歪头，真真歪来哚仔，阿像哈头嗄！”

    两个说得投机，连葛仲英、王莲生都听住了，拳也不豁，酒也不吃，只听他两个说话。及听至吴雪香说歪头，即一齐的笑起来。张蕙贞便也笑道：“耐哚拳啥勿豁哉嗄？”王莲生道：“倪听仔耐哚说闲话，忘记脱哉。”葛仲英道：“勿豁哉，我吃仔十几杯哚。”张蕙贞道：“再用两杯喤。”说了，取酒壶来给葛仲英筛酒。吴雪香插嘴道：“蕙贞阿哥要勿筛哉，俚吃仔酒要无清头个，请王老爷用两杯罢。”张蕙贞笑着，转问王莲生道：“耐阿要吃嗄？”莲生道：“倪再豁五拳吃饭，总勿要紧唍。”又笑向吴雪香道：“耐放心，我也匆拨俚多吃末哉。“雪香不好拦阻，看着葛仲英与王莲生又豁了五拳。张蕙贞筛上酒，随把酒壶授与娘姨收下去。王莲生也叫拿饭来，笑说：“夜头再吃罢。”

    于是吃饭揩面，收抬散坐。吴雪香立时催葛仲英回去。仲英道：“歇一歇喤。”雪香道：“歇啥嗄，倪勿要。”仲英道：“耐勿要，先去末哉。”雪香瞪着眼问道：“阿是耐勿去？”

    仲英只是笑，不动身。雪香使性子，立起来一手指着仲英脸上道：“耐晚歇来末，当心点！”又转身向王莲生说：“王老爷来啊。”又说：“蕙贞阿哥，倪搭来白相相喤。”张蕙贞答应，赶着去送，雪香已下楼了。

    蕙贞回房，望葛仲英嗤的一笑。仲英自觉没趣，局促不安。

    倒是王莲生说道：“耐请过去罢，贵相好有点勿舒齐哉。”仲英道：“耐瞎说！管俚舒齐勿舒齐。”莲生道：“耐要勿实概喤。俚教耐过去，总是搭耐要好，耐就依仔俚也蛮好唍。”仲英听说，方才起身。莲生拱拱手道：“晚歇请耐早点。”仲英乃一笑告辞而去。

    第五回终。