陆里，教娘姨跟好仔，一淘去末原一淘来。倘忙一日勿看见仔，要娘姨、相帮供四面八方去寻得来，寻勿着仔吵煞哉！我有日子到俚搭去，有心要看看俚哚，陆里晓得俚哚两家头对面坐好仔，呆望来哚，也匆说啥一句闲话。问俚哚阿是来里发痴？俚哚自家也说匆出唍。”汤啸庵道：“想来也是俚哚缘分。”云甫道：“啥缘分嗄，我说是冤牵！耐看玉甫近日来神气常有点呆致致，拨来俚哚圈牢仔，一步也走勿开个哉。有辰光我教玉甫去看戏，漱芳说：‘戏场里锣鼓闹得势，要勿去哉。’我教玉甫去坐马车，漱芳说：‘马车跑起来颠得势，要勿去哉。’最好笑有一转拍小照去，说是眼睛光也拨俚哚拍仔去哉；难末日朝天亮快勿曾起来，就搭俚恬眼睛，说恬仔半个月坎坎好。”大家听说，重又大笑。

    陶云甫回头把手指着自己叫的倌人覃丽娟，笑道：“像倪做个相好，要好末勿要好，倒无啥。来仔也勿讨厌，去仔也想勿着，随耐个便，阿是要写意多花哚？”覃丽娟按说道：“耐说说俚哚，啥说起倪来哉嗄？耐要像俚哚要好末，耐也去做仔俚末哉唍。”云甫道：“我说耐好，倒说差哉。”丽娟道：“耐去调皮末哉。倪不过实概样式，要好勿会好，要邱也匆会邱。”

    云甫道：“为此我说耐好唍。耐自家去转仔啥念头，倒说我调皮。”朱蔼人正色道：“耐说末说白相，倒有点意思。我看下来，越是搭相好要好，越是做勿长。倒是不过实概末，一年一年，也做去看光景。”蔼人背后林素芬虽不来接嘴，却也在那里做鬼脸。罗子富一眼看见，忙岔开道：“要勿说哉。蔼人摆个庄，倪来豁拳哉。”

    第七回终。