歇，就匆叫局也无啥。”黄翠凤道：“王老爷，耐酒倒要去吃哚，耐勿去吃酒，倒拨沈小红哚好笑。我说耐只当无拨啥事体，酒末只管去吃，吃仔酒末就台面浪约好两个朋友，散下来一淘到小红搭去，阿是蛮好？”

    莲生一想勿差，就依着翠凤说，忙又吸了两口烟。来安领轿子来了，也呈上一张洪善卿请客票头。子富道：“一淘去哉唍。”

    莲生点头说好。子富令喊高升。高升回说：“轿子等仔歇哉。”

    于是，王莲生、罗子富各自坐轿，并赴公阳里周双珠家。

    到了楼上，洪善卿迎着，见两位一淘来了，便叫娘姨阿金喊“起手巾”，随请两位进房。房里先到的有葛仲英、陈小云、汤啸庵三位；还有两位面生的，乃是张小村、赵朴斋。大家问姓通名，拱手让坐。外场已绞了手巾上来。汤啸庵忙问王莲生：“叫啥人？”莲生道：“我匆叫哉。”周双珠插嘴道：“耐本阿有啥勿叫局个嗄？”洪善卿道：“就叫仔个清倌人罢。”

    汤啸庵道：“我来荐一个，包耐出色。”遂把手一指，“耐看喤。”王莲生回头看时，周双珠肩下坐着一个清倌人，羞怯怯的低下头去，再也不抬起来。罗子富先过去弯着腰一看，道：“我只道是双宝，倒勿是。”周双珠道：“俚叫双玉。”王莲生道：“本堂局蛮好，写末哉。”

    洪善卿等汤啸庵写毕局票，即请入席。大姐巧囡立在周双玉身傍，说道：“过去换衣裳哉唍。”双玉乃回身出房。

    第九回终。