倪勿多歇吃饭，要勿客气”爱珍道：“稍微点点。”

    巧珍皱眉插嘴道：“阿姐，耐啥实概嗄，我搭耐阿有啥客气喤？俚乃要吃啥点心，我来说末哉，俚乃也要勿吃唍。”爱珍不好再问，只丢个眼色与娘姨，却同巧珍去空房间说话。

    不多时，那娘姨搬上四色点心摆下三副牙筷，先请小云上坐。小云只得努力应命。再去间壁请巧珍时，巧珍还埋冤他阿姐，不肯来吃，被爱珍半拖半拽，让了过来。巧珍见有四色，又说道：“阿姐，倪匆来哉！耐算啥喤？”爱珍笑而不答，捺巧珍向高椅上与小云对面坐了，便取牙筷来要敬。巧珍道：“耐再要像客人来敬我，我勿吃哉。”爱珍道：“价末耐吃点喤。”

    当即转敬小云。小云道：“我自家吃仔歇哉，耐要勿敬哉。”

    巧珍道：“耐啥一点点勿客气哉嗄？倒亏耐要勿面孔。”小云笑道：“耐阿姐赛过是我阿姐，阿是无啥客气？”爱珍也笑道：“陈老爷倒会说哚。”巧珍向爱珍道：“耐自家也吃点喤，阿要倪来敬耐嗄？”小云听说，连忙取牙筷夹个烧卖送到爱珍面前。慌的爱珍起身说道：“陈老爷要勿喤。”巧珍别转头一笑，又道：“耐勿吃，我也要来敬耐哉。”爱珍将烧卖送还盆内，自去夹些蛋糕奉陪。巧珍也只吃了一角蛋糕放下。小云倒四色都领略些。巧珍道：“有辰光教耐吃点心，耐要勿吃。今朝倒吃仔多花。”小云笑道：“为仔阿姐去买起点心来请倪，倪少吃仔好像对勿住，阿是？”爱珍笑道：“陈老爷，耐倒说得倪来难为情煞哉！粗点心阿算啥敬意嗄？”

    娘姨绞过手巾，阿海也来回说：“马车浪催仔几埭哉，我恨得来！”巧珍道：“倪也是好去哉，点心也吃过哉。”小云笑道：“耐算搭阿姐客气，吃仔点心谢也匆谢，倒就要想去哉。

    也是个要勿面孔。”巧珍笑道：“耐勿去，阿要想吃夜饭？”

    爱珍笑道：“便夜饭是倪也吃得起哉，就请勿到陈老爷唍。”

    当时小云、巧珍道谢告辞而行。

    第十一回终。